បាត់ដំបង៖ ជនសង្ស័យម្នាក់ត្រូវបានសមត្ថកិច្ចនគរបាលការពារព្រំដែនគោកក្នុងខេត្តបាត់ដំបង ឃាត់ខ្លួនបន្ទាប់ពីនាំពលករខ្មែរជិត ៦០នាក់ឆ្លងដែនចូលទឹកដីថៃដោយខុសច្បាប់។

មេបញ្ជាការវរ: ៨១៩ លោកវរសេនីយ៍ឯក ម៉ង់ ស៊ី បានឲ្យដឹងថា ក្រោមកិច្ចសហការជាមួយភាគី ទាហានឈុតខ្មៅថៃទប់ស្កាត់ពលករលួចឆ្លងដែនដោយមិនស្របច្បាប់ចូលក្នុងទឹកដីថៃ បានឃាត់ខ្លួនមនុស្សចំនួន ៥៧នាក់ ក្នុងនោះស្រី ២៣នាក់ និងក្មេង ៥នាក់ កាលពីព្រឹកវេលាម៉ោង ៧:០០នាទី ថ្ងៃទី១៦ ខែតុលានេះត្រង់ចំណុចបង្គោលសីមាលេខ ៥៣ និង៥៤ ភូមិសាស្រ្តភូមិអូរក្រូច ឃុំបឹងរាំង ស្រុកកំរៀង ខេត្តបាត់ដំបង។

ក្រោយពីឃាត់ខ្លួនសួរនាំ សមត្ថកិច្ចបានកំណត់មុខសញ្ញាជនសង្ស័យជាមេខ្យល់នាំមនុស្សឆ្លងដែន ចំនួន ០១នាក់ក្នុងចំណោមពលករចំនួន ៥៧នាក់នោះ មានឈ្មោះ ឈន ត្រាន់ ភេទប្រុស អាយុ ៣៩ឆ្នាំ រស់នៅ ភូមិបឹងរាំង ស្រុកកំរៀង ខេត្តបាត់ដំបង។

បច្ចុប្បន្នកម្លាំងនគបាលវរសេនាតូចការពារព្រំដែន ៨១៩បានធ្វើកំណត់ហេតុ និងប្រគល់ជនសង្ស័យខាងលើទៅអោយកម្លាំងអធិការដ្ឋាននគរបាលស្រុកកំរៀងអនុវត្តតាមនីតិវិធីច្បាប់បន្ត៕